ಅಂಕೋಲಾ ಕಾಲೇಜು ಪ್ರಿನ್ಸಿಪಾಲ್ ದೂರಿಗೆ ಜಯ: ಬೈಂದೂರಿನಲ್ಲಿ ಲೋಕಾಯುಕ್ತ ಬಲೆಗೆ ಬಿದ್ದ ಭ್ರಷ್ಟ ಆಡಿಟರ್.

ಲೋಕಾಯುಕ್ತ ಬಲೆಗೆ ಬಿದ್ದ ಭ್ರಷ್ಟ ಆಡಿಟರ್: ಅಂಕೋಲಾ ಪ್ರಿನ್ಸಿಪಾಲ್ ದೂರಿಗೆ ಸಿಕ್ಕ ಜಯ

ಉತ್ತರ ಕನ್ನಡ ಜಿಲ್ಲೆಯ ಅಂಕೋಲಾ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಲೆಕ್ಕ ಪರಿಶೋಧನೆ ವೇಳೆ ಲಂಚಕ್ಕೆ ಬೇಡಿಕೆ ಇಟ್ಟಿದ್ದ ರಾಜ್ಯ ಲೆಕ್ಕಪತ್ರ ಇಲಾಖೆಯ ಆಡಿಟರ್ ರಘುನಂದನ ಎಸ್.ಎಸ್. (ಮೂಲತಃ ತುಮಕೂರು) ಲೋಕಾಯುಕ್ತ ಬಲೆಗೆ ಬಿದ್ದಿದ್ದಾರೆ.ಕಾಲೇಜಿನ ಹಣಕಾಸು ವ್ಯವಹಾರದಲ್ಲಿ ಲೋಪವಾಗಿದೆ ಎಂದು ಹೆದರಿಸಿ, ಪಾಸಿಟಿವ್ ವರದಿ ನೀಡಲು ಆಡಿಟರ್‌ಗಳು 1 ಲಕ್ಷ ರೂಪಾಯಿ ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು. ಹಣ ನೀಡದಿದ್ದರೆ ನೆಗೆಟಿವ್ ವರದಿ ನೀಡುವುದಾಗಿ ಬೆದರಿಕೆ ಹಾಕಿದ್ದರು.

ಈ ಭ್ರಷ್ಟಾಚಾರಕ್ಕೆ ಮಣಿಯದ ಕಾಲೇಜಿನ ಮಹಿಳಾ ಪ್ರಿನ್ಸಿಪಾಲ್ ಡಾ. ವಿಜಯ ಯು. ಪಾಟೀಲ್ ಅವರು ಲೋಕಾಯುಕ್ತಕ್ಕೆ ದೂರು ನೀಡಿದ್ದರು.ಲೋಕಾಯುಕ್ತರ ಸೂಚನೆಯಂತೆ ಪ್ರಿನ್ಸಿಪಾಲರು ಆಡಿಟರ್‌ಗಳಿಗೆ ಕರೆ ಮಾಡಿದಾಗ, ಅವರು ಮೊದಲು ಭಟ್ಕಳಕ್ಕೆ ಬರುವಂತೆ ತಿಳಿಸಿದ್ದರು. ಅದರಂತೆ ಪ್ರಿನ್ಸಿಪಾಲರು ಅಂಕೋಲಾದಿಂದ ಭಟ್ಕಳಕ್ಕೆ ತೆರಳಿದ್ದರು. ಆದರೆ ಅಲ್ಲಿಗೆ ತಲುಪಿದಾಗ ಆಡಿಟರ್‌ಗಳು ತಮ್ಮ ವರಸೆ ಬದಲಿಸಿ, ತಾವು ಬೈಂದೂರಿನಲ್ಲಿರುವುದಾಗಿ ಹೇಳಿ ಅಲ್ಲಿಗೆ ಬರುವಂತೆ ಸೂಚಿಸಿದರು. ಆಡಿಟರ್ ನ ಮಾತಿನಂತೆ ಪ್ರಿನ್ಸಿಪಾಲರು ಭಟ್ಕಳದಿಂದ ಬೈಂದೂರಿಗೆ ಪ್ರಯಾಣ ಬೆಳೆಸಿದರು.ದಿನಾಂಕ 08/07/2026 ರಂದು ಬೈಂದೂರಿನಲ್ಲಿ ಅಂಕೋಲಾದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಪ್ರಿನ್ಸಿಪಾಲರಿಂದ 80,000 ರೂಪಾಯಿ ಲಂಚ ಸ್ವೀಕರಿಸುತ್ತಿದ್ದ ವೇಳೆ ಲೋಕಾಯುಕ್ತ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ.

ಈ ಸಂದರ್ಭದಲ್ಲಿ ಓಡಿಹೋಗಲು ಯತ್ನಿಸಿದ ಆಡಿಟರ್‌ಗಳನ್ನು ಹಣದ ಸಮೇತ ರೆಡ್ ಹ್ಯಾಂಡ್ ಆಗಿ ಲೋಕಾಯುಕ್ತ ಅಧಿಕಾರಿಗಳು ಸೆರೆಹಿಡಿದಿದ್ದಾರೆ.ಲೋಕಾಯುಕ್ತ ಎಸ್ಪಿ ಕುಮಾರಚಂದ್ರ ನೇತೃತ್ವದಲ್ಲಿ, ಡಿವೈಎಸ್ಪಿ ಧನ್ಯ ನಾಯಕ್ ಹಾಗೂ ಇನ್ಸ್‌ಪೆಕ್ಟರ್ ವಿನಾಯಕ ಬಿಲ್ಲವ ಮತ್ತು ಸಿಬ್ಬಂದಿ ಈ ಯಶಸ್ವಿ ಕಾರ್ಯಾಚರಣೆ ನಡೆಸಿದ್ದಾರೆ. ನಿನ್ನೆ ದಿನಾಂಕ 8/07/2026 ರ ತಡರಾತ್ರಿಯವರೆಗೂ ಪ್ರಕ್ರಿಯೆ ನಡೆದಿದ್ದು, ಮುಂದಿನ ತನಿಖೆ ಮುಂದುವರಿದಿದೆ. ಭ್ರಷ್ಟರ ವಿರುದ್ಧ ಧೈರ್ಯವಾಗಿ ದೂರು ನೀಡಿದ ಪ್ರಿನ್ಸಿಪಾಲ್ ಡಾ. ವಿಜಯ ಯು. ಪಾಟೀಲ್ ಅವರ ನಡೆಗೆ ಶ್ಲಾಘನೆ ವ್ಯಕ್ತವಾಗಿದೆ.