ಅಂಕೋಲಾ: ಪೌರಾಡಳಿತ ಇಲಾಖೆಯಲ್ಲಿ ಸುಮಾರು 39 ವರ್ಷಗಳ ಕಾಲ ಸುದೀರ್ಘ, ಸ್ತುತ್ಯಾರ್ಹ ಹಾಗೂ ನಿಷ್ಕಳಂಕ ಸೇವೆ ಸಲ್ಲಿಸಿದ ಅಂಕೋಲಾ ಪುರಸಭೆಯ ಕಛೇರಿ ವ್ಯವಸ್ಥಾಪಕರಾದ ಶ್ರೀಮತಿ ಸುರೇಖಾ ಎಸ್ ಪಾರ್ಸೆಕರ್ ಅವರು ನಾಳೆ ಏಪ್ರಿಲ್ 30ರಂದು ತಮ್ಮ ವೃತ್ತಿ ಜೀವನದಿಂದ ನಿವೃತ್ತಿ ಹೊಂದುತ್ತಿದ್ದಾರೆ.
ಸಾರ್ವಜನಿಕ ಸೇವೆಯನ್ನೇ ಬದುಕಿನ ಶ್ರೇಷ್ಠ ಗುರಿಯಾಗಿಸಿಕೊಂಡು, ಕಛೇರಿಯ ಘನತೆಯನ್ನು ಸದಾ ಎತ್ತಿ ಹಿಡಿದ ಇವರ ಸಾರ್ಥಕ ಪಯಣವು ನಾಳೆ ವಿಶ್ರಾಂತ ಜೀವನಕ್ಕೆ ತೆರೆದುಕೊಳ್ಳಲಿದೆ. 1987ರಲ್ಲಿ ದಾಂಡೇಲಿ ನಗರಸಭೆಯಲ್ಲಿ ದ್ವಿತೀಯ ದರ್ಜೆ ಸಹಾಯಕರಾಗಿ ವೃತ್ತಿ ಬದುಕು ಆರಂಭಿಸಿದ ಸುರೇಖಾ ಅವರು, ಹಳಿಯಾಳ ಮತ್ತು ಕಾರವಾರಗಳಲ್ಲಿಯೂ ಕಾರ್ಯನಿರ್ವಹಿಸಿ ತಮ್ಮ ದಕ್ಷತೆಯನ್ನು ಸಾಬೀತುಪಡಿಸಿದ್ದರು. 2016ರಲ್ಲಿ ಬಡ್ತಿ ಹೊಂದಿ ಅಂಕೋಲಾ ಪುರಸಭೆಯ ಕಛೇರಿ ವ್ಯವಸ್ಥಾಪಕರಾಗಿ ಜವಾಬ್ದಾರಿ ವಹಿಸಿಕೊಂಡ ಇವರು, ಅಂದಿನಿಂದ ಇಂದಿನವರೆಗೂ ಆಡಳಿತ ಯಂತ್ರದ ಚಾಲಕಶಕ್ತಿಯಾಗಿ ಕೆಲಸ ಮಾಡಿದ್ದಾರೆ.
ತಮ್ಮ 60ರ ಇಳಿ ವಯಸ್ಸಿನಲ್ಲಿಯೂ ಕಾರವಾರದಿಂದ ಅಂಕೋಲಾಕ್ಕೆ ಪ್ರತಿನಿತ್ಯ ಸಾರಿಗೆ ಬಸ್ ಮೂಲಕವೇ ಬರೋಬ್ಬರಿ 72 ಕಿಲೋಮೀಟರ್ ದೂರ ಕ್ರಮಿಸುತ್ತಾ, ಸಕಾಲಕ್ಕೆ ಕಛೇರಿಗೆ ಹಾಜರಾಗುತ್ತಿದ್ದ ಅವರ ಶಿಸ್ತು ಮತ್ತು ಸರಳ ಜೀವನಶೈಲಿ ಇಂದಿನ ಯುವ ನೌಕರರಿಗೆ ನಿಜಕ್ಕೂ ದಾರಿದೀಪ.
ಸೇವಾವಧಿಯ ಅಂತಿಮ ಘಟ್ಟದಲ್ಲಿ ಸುರೇಖಾ ಪಾರ್ಸೆಕರ್ ಅವರು ಈಗಿನ ಮುಖ್ಯಾಧಿಕಾರಿಗಳಾದ ಶ್ರೀ ಎಸು ಎಸ್ ಬೆಂಗಳೂರು ಅವರ ಮಾರ್ಗದರ್ಶನವನ್ನು ಭಾವುಕರಾಗಿ ಸ್ಮರಿಸಿದ್ದಾರೆ. “ಪ್ರತಿಯೊಬ್ಬ ಸಿಬ್ಬಂದಿಯನ್ನು ಸಮಾನವಾಗಿ ಕಂಡು, ಕೆಲಸದ ಒತ್ತಡದ ನಡುವೆಯೂ ನೆಮ್ಮದಿಯಿಂದ ಕಾರ್ಯನಿರ್ವಹಿಸಲು ಪ್ರೋತ್ಸಾಹ ನೀಡುವ ಇಂತಹ ಮುಖ್ಯಾಧಿಕಾರಿಗಳ ಅಡಿಯಲ್ಲಿ ಕೆಲಸ ಮಾಡಿದ್ದು ನನ್ನ ವೃತ್ತಿ ಜೀವನದ ಸೌಭಾಗ್ಯ” ಎಂದು ಅವರು ಕೃತಜ್ಞತೆ ಸಲ್ಲಿಸಿದ್ದಾರೆ.
ಸುಖಕರ ನಿವೃತ್ತ ಜೀವನಕ್ಕೆ ಹಾರೈಕೆ:
ಅಂಕೋಲಾ ಪುರಸಭೆಯ ಮುಖ್ಯಾಧಿಕಾರಿಗಳಾದ ಶ್ರೀ ಎಸು ಎಸ್ ಬೆಂಗಳೂರು ಅವರು ಮಾತನಾಡಿ, “ಶ್ರೀಮತಿ ಸುರೇಖಾ ಪಾರ್ಸೆಕರ್ ಅವರು ಪುರಸಭೆಯ ಅತ್ಯಂತ ನಂಬಿಕಸ್ತ ಮತ್ತು ದಕ್ಷ ಅಧಿಕಾರಿಯಾಗಿದ್ದರು. ಕಛೇರಿಯ ಕೆಲಸಗಳನ್ನು ಅತ್ಯಂತ ಜವಾಬ್ದಾರಿಯಿಂದ ನಿಭಾಯಿಸುತ್ತಿದ್ದ ಇವರ ಸೇವೆ ಸ್ಮರಣೀಯವಾದುದು. ಸುದೀರ್ಘ ಕಾಲದ ಇವರ ಈ ಸಾರ್ಥಕ ಸೇವೆಯ ನಂತರದ ಜೀವನವು ಸುಖ, ಶಾಂತಿ ಮತ್ತು ಆರೋಗ್ಯದಿಂದ ಕೂಡಿರಲಿ” ಎಂದು ಮನತುಂಬಿ ಹಾರೈಸಿದ್ದಾರೆ.
ಪುರಸಭೆಯ ಅಧಿಕಾರಿಯಾಗಿ ಸೇವೆ ಸಲ್ಲಿಸಿ ನಿವೃತ್ತರಾದ ಪತಿ ಅರುಣ ನಾಯ್ಕ್ ಮತ್ತು ಪುತ್ರ ಸಾಯಿಸ್ ಅವರೊಂದಿಗೆ ನಿವೃತ್ತ ಜೀವನಕ್ಕೆ ಸಜ್ಜಾಗಿರುವ ಸುರೇಖಾ ಅವರಿಗೆ, ನಾಳೆ ದಿನಾಂಕ 30-04-2026ರ ಗುರುವಾರ ಸಂಜೆ 5:00 ಗಂಟೆಗೆ ಅಂಕೋಲಾ ಪುರಸಭೆ ಕಛೇರಿಯಲ್ಲಿ ಭಾವಪೂರ್ಣ ಅಭಿನಂದನಾ ಸಮಾರಂಭವನ್ನು ಹಮ್ಮಿಕೊಳ್ಳಲಾಗಿದೆ. ಈ ಸಂದರ್ಭದಲ್ಲಿ ಮುಖ್ಯಾಧಿಕಾರಿಗಳು ಹಾಗೂ ಸಮಸ್ತ ಸಿಬ್ಬಂದಿ ವರ್ಗವು ಇವರ ಸೇವೆಯನ್ನು ಗೌರವಿಸಿ ಬೀಳ್ಕೊಡಲಿದ್ದಾರೆ
Leave a Reply