ಅಂಕೋಲಾದಲ್ಲಿ ಕೌಟುಂಬಿಕ ಕಾರ್ಯಕ್ರಮದ ವೇಳೆ ರಂಪಾಟ: ದೌರ್ಜನ್ಯ, ಬಿಯರ್ ಬಾಟಲಿಯಿಂದ ಹಲ್ಲೆ ನಡೆಸಿದ ಪುಂಡರ ವಿರುದ್ಧ FIR ದಾಖಲು!

ಅಂಕೋಲಾ:ಖಾಸಗಿ ಹೋಟೇಲ್‌ನಲ್ಲಿ ನಡೆದ ಕೌಟುಂಬಿಕ ಕಾರ್ಯಕ್ರಮವೊಂದರಲ್ಲಿ ಕ್ಷುಲ್ಲಕ ಕಾರಣಕ್ಕೆ ಆರಂಭವಾದ ಮಾತಿನ ಚಕಮಕಿ ವಿಕೋಪಕ್ಕೆ ತಿರುಗಿ, ವ್ಯಕ್ತಿಯೊಬ್ಬರ ಮೇಲೆ ಬಿಯರ್ ಬಾಟಲಿಯಿಂದ ಭೀಕರ ಹಲ್ಲೆ ನಡೆಸಿ, ಜೀವ ಬೆದರಿಕೆಯೊಡ್ಡಿದ ಘಟನೆಗೆ ಸಂಬಂಧಿಸಿದಂತೆ ಅಂಕೋಲಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.ಬೇಲೆಕೇರಿ ನಿವಾಸಿ ಲಕ್ಷ್ಮೀಕಾಂತ ಅನಂತ ನಾಯಕ ಎಂಬುವವರು ನೀಡಿರುವ ದೂರಿನನ್ವಯ ಗಣೇಶ, ರಜತ ಹಾಗೂ ರಕ್ಷತ ಎಂಬ ಮೂವರು ಆರೋಪಿಗಳ ವಿರುದ್ಧ ಅಂಕೋಲಾ ಪೊಲೀಸ್ ಠಾಣೆಯಲ್ಲಿ ಪ್ರಥಮ ವರ್ತಮಾನ ವರದಿ (FIR) ದಾಖಲಾಗಿದೆ.

ದೂರಿನಲ್ಲೇನಿದೆ?:ದೂರುದಾರರಾದ ಲಕ್ಷ್ಮೀಕಾಂತ ಅವರು ದಿನಾಂಕ: ೦೮-೦೮-೨೦೨೬ ರಂದು ಠಾಣೆಗೆ ಹಾಜರಾಗಿ ನೀಡಿದ ದೂರಿನ ಸಾರಾಂಶದ ಪ್ರಕಾರ, ದಿನಾಂಕ: ೦೭-೦೮-೨೦೨೬ ರಂದು ರಾತ್ರಿ ೮:೩೦ ಗಂಟೆ ಸುಮಾರಿಗೆ ತಾನು ತನ್ನ ಕುಟುಂಬದವರೊಂದಿಗೆ ಹತ್ತಿರದ ಸಂಬಂಧಿಯ ಮಗಳು ಆರಾಧ್ಯ ಅವರ ಹುಟ್ಟುಹಬ್ಬದ ಸಂಭ್ರಮಾಚರಣೆಗಾಗಿ ಅಂಕೋಲಾ ಇಂಟರ ನ್ಯಾಷನಲ್ ಹೋಟೇಲ್‌ಗೆ ರಾತ್ರಿ ೮:೩೦ರ ಸುಮಾರಿಗೆ ಆಗಮಿಸಿದ್ದರು. ಕಾರ್ಯಕ್ರಮ ಮುಗಿದ ನಂತರ ರಾತ್ರಿ ೧೦:೩೦ರ ಸುಮಾರಿಗೆ ತಾವು ಹೋಟೇಲ್‌ನ ಕೆಳಭಾಗದಲ್ಲಿದ್ದ ಶೌಚಾಲಯಕ್ಕೆ ತೆರಳಿದ್ದಾಗ, ಅಲ್ಲಿ ಸುಮಾರು ೧೦ ರಿಂದ ೧೨ ಜನರ ಗುಂಪು ಮದ್ಯಪಾನ ಮಾಡುತ್ತಾ ಕುಳಿತಿದ್ದರು.

ಶೌಚಾಲಯದಿಂದ ಹೊರಬಂದು ಪರಿಚಯಸ್ಥರಾದ ಉಜ್ವಲ ಅವರೊಂದಿಗೆ ಮಾತನಾಡಿ ಹೊರಬರುವಾಗ, ತಮ್ಮ ಪುತ್ರಿ ವರಾಹ ಕೂಡ ಒಳಗೆ ಬಂದಿದ್ದಳು. ಈ ವೇಳೆ ಮಗಳನ್ನು ಉದ್ದೇಶಿಸಿ “ಒಳಗೆ ಏಕೆ ಬಂದೆ?” ಎಂದು ಸಹಜವಾಗಿ ಪ್ರಶ್ನಿಸಿದ್ದಾಗಿ ಅಲ್ಲಿ ಮದ್ಯಪಾನ ಮಾಡುತ್ತಾ ಕುಳಿತಿದ್ದವರ ಪೈಕಿ ಹಸಿರು ಬಣ್ಣದ ಟಿ-ಶರ್ಟ್ ಧರಿಸಿದ್ದ ವ್ಯಕ್ತಿ, ಏಕಾಏಕಿ ತಮ್ಮ ವಿರುದ್ಧ ಆಕ್ರೋಶಗೊಂಡು ಅವಾಚ್ಯ ಶಬ್ದಗಳಿಂದ ನಿಂದಿಸಲು ಪ್ರಾರಂಭಿಸಿದನೆಂದು ದೂರುದಾರರು ಉಲ್ಲೇಖಿಸಿದ್ದಾರೆ.

ಬಾಟಲಿಯಿಂದ ಹಲ್ಲೆ, ಜೀವ ಬೆದರಿಕೆ* :ಮಾತಿಗೆ ಮಾತು ಬೆಳೆದಂತೆಹಸಿರು ಬಣ್ಣದ ಟಿ-ಶರ್ಟ್ ಧರಿಸಿದ್ದ ವ್ಯಕ್ತಿಗೆ ಬೆಂಬಲವಾಗಿ ನಿಂತ ಪ್ಯಾರೋಟ್ ಗ್ರೀನ್ ಟಿ-ಶರ್ಟ್ ಧರಿಸಿದ್ದ ವ್ಯಕ್ತಿ ಹೊಡೆಯಲು ಬಂದಿದ್ದು, ಅಲ್ಲಿಯೇ ಇದ್ದ ಹಸಿರು ಬಣ್ಣದ ಟಿ-ಶರ್ಟ್ ಧರಿಸಿದ್ದ ವ್ಯಕ್ತಿ ಬಾಟಲಿಯಿಂದ ತಮ್ಮ ಕೈಗೆ ಬಲವಾಗಿ ಹೊಡೆದು ಗಾಯಗೊಳಿಸಿದ್ದಾನೆ. ಇವರಿಗೆ ಬೆಂಬಲವಾಗಿ ಬಿಳಿ ಬಣ್ಣದ ಟಿ-ಶರ್ಟ್ ಧರಿಸಿದ್ದ ಇನ್ನೊಬ್ಬ ವ್ಯಕ್ತಿಯೂ ಅವಾಚ್ಯ ಶಬ್ದಗಳಿಂದ ಬೈದಿರುವುದಾಗಿ ದೂರಿನಲ್ಲಿ ವಿವರಿಸಲಾಗಿದೆ.ನಂತರ ವಿಚಾರಿಸಿದಾಗ ಹಸಿರು ಟಿ-ಶರ್ಟ್ ಧರಿಸಿದ್ದಾತ ಗಣೇಶ, ಪ್ಯಾರೋಟ್ ಗ್ರೀನ್ ಟಿ-ಶರ್ಟ್ ಧರಿಸಿದ್ದಾತ ರಜತ ಹಾಗೂ ಬಿಳಿ ಟಿ-ಶರ್ಟ್ ಧರಿಸಿದ್ದಾತ ರಕ್ಷತ ಎಂದು ತಿಳಿದುಬಂದಿದೆ.

ಗಲಾಟೆಯನ್ನು ಬಿಡಿಸಲು ತಕ್ಷಣ ಮಧ್ಯಪ್ರವೇಶಿಸಿದ ತಮ್ಮ ಸಹೋದರ ಉಮಾಕಾಂತ ಅವರ ಮೇಲೆಯೂ ಆರೋಪಿಗಳ ಗುಂಪು ಹಲ್ಲೆ ನಡೆಸಿ, ಅವಾಚ್ಯ ಶಬ್ದಗಳಿಂದ ನಿಂದಿಸಿ ಕೊಲೆ ಬೆದರಿಕೆ ಹಾಕಿದ್ದಾರೆ ಎಂದು ದೂರುದಾರರು ಆರೋಪಿಸಿದ್ದಾರೆ.ಘಟನೆಯಲ್ಲಿ ಗಾಯಗೊಂಡ ಲಕ್ಷ್ಮೀಕಾಂತ ಅವರು ಆಸ್ಪತ್ರೆಗೆ ತೆರಳಿ ಚಿಕಿತ್ಸೆ ಪಡೆದುಕೊಂಡ ನಂತರ ಅಂಕೋಲಾ ಪೊಲೀಸ್ ಠಾಣೆಗೆ ಆಗಮಿಸಿ ದೂರು ನೀಡಿದ್ದಾರೆ. ದೂರು ಸ್ವೀಕರಿಸಿರುವ ಪಿಎಸ್‌ಐ ಗುರುನಾಥ ಹಾದಿಮನಿ ಅವರು ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.